బిగ్ బాస్ వ్యవహారాలు-వేదాంతం శ్రీపతి శర్మ

మన దేశంలోని రాజకీయ విశ్లేషకులు ఒబామా ఎంచుకున్న పాకిస్తాన్, అఫ్ఘానిస్తాన్ ఎన్వై రిచర్డ్ హోల్బ్రూక్ పరిధి లోంచి కశ్మీర్ వ్యవహారాన్ని తొలగించినoదుకు సంతోషిoచారు. యూ. ఎస్. లోని కొందరు భారతీయులు కూడా కొద్ది సేపు హమ్మయ్య అన్నారు. కొన్ని చోట్ల ఇది భారత దేశపు దౌత్యానికి ఒక విజయం అని కూడా వ్యాఖ్యానించారు. ఇదేంటి?

హోల్బ్రూక్ ని బుల్డోజర్ అని 1995 తరువాత పిలువటం ప్రారంభించారు. బోస్నియాలో యుధ్ధం జరుపుతున్న ఇద్దరినీ భయపెట్టి మాటలలోకి దింపి ఈయన యుధ్ధాన్ని ఆపిన వ్యక్తి. అటువంటి వాడు పాకిస్తాన్ అఫ్ఘానిస్తాన్ వ్యవహారాలతో పాటు కశ్మీర్ ను కూడా చంకలో పెట్టుకుని ఇటు వైపు బయలుదేరితే మంచిది కాదని దక్షిణ ఆసియా వ్యవహారాలు సమీక్షించే మేధావులు అభిప్రాయ పడ్డారు.

మన దేశంలో కొన్ని పత్రికలు ఇది పెద్ద ఉపయోగకరమైనది కాదని చెబుతున్నాయి.
యు.ఎస్. రిసెషన్ కు సంబంధించి చైనాతో జరుపు సంబంధ వ్యవహారాలూ, అఫ్ఘాన్ పరిస్థితి వలన పాకిస్తాన్తో పెట్టుకున్న సంబంధాలు, ఒబామా సి.టి. బి.టి మీద చూపుతున్న మొగ్గు యు.ఎస్. భారత సంబంధాలకు అంత మంచి సూచకాలు కావని కొందరు అభిప్రాయ పడుతున్నారు.

26.01.2009 రోజున ఒబామ భారత దేశానికి యు.ఎస్.ను మించిన మిత్రుడు లేడని సినిమా పక్కీలో చెప్పిన గంటలో ఆ దేశంలో కంపెనీలు కేవలo భారతీయులనే ఉద్యోగాల నుంచి తీసేస్తున్నామని ప్రకటించాయి!

కొద్దిగా లోపలికి వెళితే ప్రపంచ వ్యవహారాలలో మన దేశం సక్రియంగా ఈ మధ్య పాల్గొనకపోవటం వలన మన సమస్యలను మనకు యు.ఎస్. ఎక్కువగా వదిలేయటం జరుగుతోందని ఎకనమిక్ టైంస్ చెబుతోంది.

కశ్మీర్, పాకిస్తానుకు వస్తే మనం స్వయంగా ఏమి చేయగలుగుతున్నాం? ఏమీ కనపడదు. ముంబయిలో జరిగిన దానికి ప్రపంచ దౌత్య వ్యవహారాలను వేగం పెంచి హడావుడి చేశారు. మరల మెదలకుండా కూర్చున్నారు. ఏదైనా చేయగలం, ఏదైనా చేయగలం అంటూ చొక్కాలు చించుకున్నారు…

కాకపోతే హోల్బ్రూక్ ను ఈ గొడవ నుంచి తప్పించి యు.ఎస్. మన దేశానికి మంచి మాటే చెప్పింది. ‘ మీ గొడవ మీది ‘ అని ఒప్పుకుంది. చాలా కాలం క్రితమే ఐరోపా దేశాలు భారత దేశం బార్డర్స్ దాటినప్పుడు కదా మేము సమర్థిస్తామా లేమా అన్నది చెప్పేది అని ప్రకటించి యున్నాయి. బాధింప బడ్ద వాడు ముందు లేచి నిలబడి నా జోలుకి ఎందుకు వస్తున్నావు అని దెబ్బ కొట్టి అడగాలి. అది లేనప్పుడు ఏ దేశం ఏమి మాట్లాడుతుంది?