‘కామెంటరీ’-వేదాంతం శ్రీపతి శర్మ చిట్టి కథ
25 అక్టో 2009 వ్యాఖ్యానించండి
in శ్రీ-రచనలు
ఇంటి వరండా తలుపు తెరచి ఉంది. అటు రెండు , ఇటు రెండు కేను కుర్చీలు ఉన్నాయి. వాకిలి నుంచి చూడగానే ఒక పెద్దాయన ఒక కట్ బనియన్ వేసుకుని అలా కళ్లు మూసుకుని కూర్చుని ఉన్నాడు. మరో పెద్దాయన తలుపు దగ్గర నిలబడి లోపలికి, బయటకి, తరువాత అటూ ఇటూ చూశాడు. ఎవరూ కదలటం లేదని కాలింగు బెల్లు కొట్ట బోయి ఆ కూర్చుని ఉన్నాయని చూసి ఆగిపోయాడు. నిద్రా భంగమో లేక ధ్యానభంగమో అవుతుందని ఆలోచించినట్లున్నాడు. మెల్లగా లోపలికి ప్రవేశించి ఆయన ఎదురుగా ఉన్న కుర్చీలో కూర్చున్నాడు. లోపలా, బయటా ఏ శబ్దమూ లేదు. ఈయన ఒక్కడే ఉన్నాడేమో అనుకుని ఎవరైనా వచ్చే వరకూ అలనే కూర్చుందామనుకుని నిర్ణయించినట్లున్నాడు. ఇదేమిటి? మామూలుగా ఎవరి ఇంటిలోనైనా వినిపించే టి.వీ కూడా వివ్నిపించటం లేదు? మరల అలా ముని లాగా కూర్చుని ఉన్న పెద్దాయన వైపు చూశాడు. ఈ సారి మరింత జాగ్రత్తగా చూసి కుర్చీ లోకి వెనక్కి వాలాడు. ఆయన కళ్లు మూసుకుని ఉన్నాడు. కానీ కళ్లల్లోంచి నీరు అలా కారుతూ ఉంది…
~~~***~~~
‘ఏమయింది సార్?’
‘…’
‘ నేనండీ, బ్రహ్మానందాన్ని…’
ఏ ప్రతిక్రియా లేదు. పెదాల దగ్గర చిన్నగా ఒక సందడి. అంత మటుకే!
అలా కొద్ది కొద్దిగా నీరు కళ్లల్లోంచి కారుతూనే ఉంది. కట్ బనియను కొద్దిగా తడిసినా ఆయన పట్టించుకోవటం లేదు. ఒకప్పుడు బరువులు మోసిన భుజాల లాగే ఉంటాయి అవి. కుడి భుజం కొద్దిగా పెద్దది, ఎడమ భుజం కొద్దిగా చిన్నది. ఎవరికైనా అంతే! కట్ బనియన్లు గొప్పగా ఉంటాయి. ఒక వయసు వచ్చాక పెద్దగా దాచుకోవలసిన శరీరం ఉండదు కాబట్టి నీకు నేను చాలు అన్నట్లు అలా ఒక వంట వాడి ఏప్రన్ లాగా అలా గుండెకు హత్తుకుని ఉంటుంది మరి. ఒక వయసులో దానిని మించిన మిత్రుడు లేడు!
‘ సార్…’
‘…’
‘ ఏమి జరిగిందండీ? నాకు చెప్పండి. చెప్పుకుంటే అన్నీ కరగిపోతాయి. అదేమిటి? ఒక్కరే కూర్చుని అలా కన్నీరు పెట్టుకుంటే ఎలా?’
‘…’
‘ నిజమే! ఇలా వినే వారు కూడా లేరు. దిక్కుమాలిన లోకం తయారయింది. ఎక్కడ చూసినా రన్నింగు రేసే! నేనున్నా కదా? చెప్పండి.’
‘…’
‘ నా సంగతే చూడండి. నా చుట్టూతా ఉన్న వారందరూ పోలికలు, పొంతనలూ, అక్కడుందీ, ఇక్కడ లేదు అనే వారే! అంతటా పోటీలు, అన్నీ పోట్లాటలే. ఒక్కడికీ నా మాట అక్కరలేదు. ఏం చేస్తాం? సార్, మీరు అలా కూర్చోకూడదు. డాక్టర్లు కూడా మాట్లాడమంటున్నారు! ఏమయిందండీ?’
‘…’
ఆయన మరల వెనక్కి వాలాడు.
‘ ఏదో పని మీద వెళుతూ…సర్లేండి. మీతో దాపరికం ఎందుకు? నాకు పనేముంది? అలా పాత రోజుల గురించి మాట్లాడుకుందామని సుబ్బారావు గారి ఇంటికి వెళితే ఆయన ఇంటిలో ఎవరో వచ్చి ఉన్నారని కాంపఔండ్ దగ్గర నిలబడి కొద్ది సేపు మాట్లాడి వచ్చాను. ఎక్కువ సేపు నిలబడ లేక ఇలా ఇక్కడికి వచ్చాను. ఇక్కడ చాలా ప్రశాంతంగా ఉంది…’
ఆయన కళ్లు కొద్దిగా కదిలాయి.
‘ చెప్పండి…అరే! అలా కన్నీళ్లు కారిస్తే ఎలా? నన్ను చూడండి. ఒక్కడినే పిచ్చి పట్టిన వాడిలాగా అలా ఓపిక ఉన్నంతవరకూ నాలో నేను ఏవో మాట్లాడుకుంటూ వెళ్లిపోతాను. నీరసం వస్తే వెనక్కి తిరుగుతాను. ఎక్కడైనా మ అబ్బాయి కనిపిస్తే వాడు ‘ఎక్కడికీ?’ అని అరచి ‘ ఇంటికి పద!’ అంటాడు. వరండాలో కూర్చుంటే ‘ ఛలి గాలికి దగ్గుతావు. లోపలికి పద అంటాడు! గదిలోనే పడుకుంటే వాకింగ్ చెయ్య మంటాడు…’
ఆయన ఈ సారి కొద్దిగా కదిలాడు.
‘ చెప్పండి సార్. ఏమయిందీ? నాలుగు కబుర్లు చెప్పుకుందాం. ఏముంది ఇందులో?’
ఆయన ఇంతలోనే నవ్వాడు. కళ్లు తెరచి తుండుతో మొహమంతా తుడుచుకున్నాడు.
ఈయన ఎవరెస్టు ఎక్కాడు. ‘ అద్దీ! ఇప్పుడు చెప్పండి! మాట్లాడుకోవాలి సార్!’
‘ ఊ…’
‘ ఎందుకు ఏడుస్తున్నారు?’
‘ ఇప్పుడూ…’, ఆయన మొదటి సారి మాట్లాడాడు,’…కంటిలో డ్రాప్స్ వేసి అరగంట అలా కళ్లు మూసుకుని ఉండమన్నారు. అదీ నా ఏడుపు! ‘
ఈయన నోరు అలానే తెరచి ఉంచాడు.
‘ ఆ మట చెప్పవచ్చు కదా?’
‘ చెప్పాలనే అనుకున్నా! ఈ వంకతో మీ మాటలు విన్నాను కదా? మీరే కదా ఎవరూ మాట్లాడరని అన్నారు?’
‘ ఓహో! ఇదో ధ్యానం అన్న మాట!’
‘ ధ్యానం కాదు. మీ మనసు లోని బరువూ తేలిక అవలేదా?’
‘ కరెక్టే! ఇదేదో బాగుందే! ఆ డ్రాప్స్ నేనూ వాడి ఇలా వరండాలో కూర్చుంటాను. కొద్ది సేపు ఎవరైనా మాట్లాడతారేమో చూద్దాం!’
ఇద్దరూ జోరుగా నవ్వుకున్నారు.
‘ కళ్లు మూసుకుని ఇంకొకరి మాటలు అలా వింటూ ఉంటే మన
మనన్సులోకి మననం కూడా అక్కరలేదు. జరుగుతున్నది కేవలం మాయేనని తెలిసినా నిజాలను నవ్వుతూ నటింపచేయటం నిజంగా…’
‘అమ్మో…ఎంత మాట?…’, ఆయన ముక్కు మీద వేలు పెట్టాడు,’…చెప్పండి…నిజంగా?’
‘ నిజంగా ఏమీ లేదు. మీ పేరే! సమయానికి నా ముందుకు వచ్చారు. నిజంగా బ్రహ్మానందమే!’
మరో సారి నవ్వుకున్నారు ఇద్దరూ.
‘ ఎంత మాయ? జీవితం మీద కామెంటరీ ఇచ్చుకుంటూ గడిపేస్తాము. ఎప్పుడు జీవిస్తామో తెలియదు. జీవితం కామెంటరీ కాదు అని తెలుసుకునే లోపు జీవితకాలం అయిపోతుంది…’
~~~***~~~
Daily predictions
23 అక్టో 2009 వ్యాఖ్యానించండి
in శ్రీ-ఫలములు
Single line Daily predictions for Sun Signs can be viewed at www.sripati.com
This is for your kind information.
~Vedantam Sripatisarma
‘ద క్వీన్ ‘ చిత్రం పై వేదాంతం శ్రీపతి శర్మ కబుర్లు
20 అక్టో 2009 అభిప్రాయములు
in శ్రీ-చిత్రం
డయానా చరిత్ర అందరికీ తెలిసిందే! ఇటీవల నన్ను చాలా ఆలోచింప చేసిన ఒక పాత్ర (చరిత్రలోకి వెళ్లిపోయిన వారందరూ పాత్రలేనేమో!) డయానాది. దీనికి కారణం ప్రిన్స్ ఛార్లెస్, ఆమె మధ్య ప్రేమ వ్యవహారం, తరువాత రాయల్ కుటుంబం లో కలిగిన తేడాలు ఇవి కావు. మానవ చరిత్ర రాజు పేద మధ్య ఉన్న కథే. ఇది కలిపే ఒక కనిపించని వంతెన మీద ఆమె నిలబడి అది కలవదు కాబట్టి ఆ కదిలే వంతెన మీద నుంచి అలా పడి పోయింది. ఒక మామూలు కుటుంబం నుంచి డయానా ఆ రాజసం లొకి వెళ్లినప్పుడు ఒక మాట. ఆమె రాజగృహాన్ని (ఈ పదం చిత్రంగా ఉన్నా ఎందుకో వాడాలనిపిస్తోంది ) జన సామాన్యంలోకి తెచ్చే ప్రయత్నం బ్రిటన్ రాజకీయాలలో ఒక మైలు రాయి. డయానా పొందిన ప్రాచుర్యం సామాన్యమైనది కాదు. ఆ దేశంలో రాణీ గారి పట్ల ఉన్న ప్రజాభిప్రాయం డయానా లోంచి కదిలి ఒక ఊపు ఊపింది. డయానా ప్రజల పక్షం, ఛార్లెస్ మధ్య నిలబడి ప్రజలకు చేయిని అందించిన ఒక రాజకుమారుడు, డయానా ద్వారా కన్న పిల్లలు కాబోయే రాజులు…సూర్యుడు అస్తమించని దేశం, రాచరికం గత వైభవాలను క్షణ క్షణం గుర్తు చేసే దేశం. ప్రజాస్వామ్యం సజీవంగా ఉన్న దేశం! ఏది ధర్మం, ఏది న్యాయం?
~~~***~~~
తెర తీద్దాం…
టోనీ బ్లెయిర్ ఎన్నికలలో డయానా పేరు వాడుకుని (చివరి ప్రచార దశలో) గెలుస్తాడు. ఆమెను ప్రజల రాజకుమారిగా వర్ణిస్తాడు. ఆమె ఆ రోజులలో కారు ప్రమాదంలో మరణిస్తుంది. ఆమెకు విడాకులు ఇవ్వటం జరిగిపోయింది కాబట్టి అంత్యక్రియలు వాళ్ల కుటుంబం యొక్క స్వవిషయం అని ఎలిజబెత్ రాణి పబ్లిక్ గా ఏ వక్తవ్యం ఇవ్వదు. జనం లో కలిగిన ఆందోళన, మీడియాలో రేగిన వివాద, బ్లెయిర్ రాణీని ఒప్పించి టి.వీ లో మాట్లాడించటం, రాణీ ఆ అంత్యక్రియలకు హాజరవ్వటం, ఇవన్నీ నాటకీయంగా చూపించటం జరుగుతుంది.
దర్శకుడు చిత్రీకరించిన తీరు ఎంతగానో ఆకట్టుకుంటుంది. ఒక రాజకీయ ఇతివృత్తం గల నేపథ్యం అయినప్పటికీ ఎక్కడా ఒక్క క్షణం కూడా విసుగు కలగని చిత్రం ఇది. పాత్రలు-బ్లెయిర్, ఛార్లెస్, ఎలిజబెత్ రాణి, బ్లెయిర్ భార్య…అంతే. అందరి కోణాలు వరుస వరుసగా చక్రం లా తిప్పుతాడు దర్శకుడు.
ఒక ప్రముఖ ఘటనను ఎంచుకుని దాని చుట్టూ ఉన్న విషయాలను పాత్రల ద్వారా ఎంతో నేర్పుతో చూపించే ప్రక్రియ ఇది. మనకి సంఘటన తెలుసు. దాని తరువాత ఇలా జరిగి ఉండవచ్చు అనిపించేది ఒక వైపు. దానినే కొద్దిగా ఫోకస్ మార్చి కాన్సెప్చుచల్ గా ఒక వైపరీత్యాన్ని ప్రదర్శించటం రెండవ వైపు. ఈ రెండు వ్యవహారాలలో అద్భుతమైన విజయాన్ని సాధించాడు దర్శకుడు.
బ్లెయిర్ రాణీని ఒప్పించటం ఒక విజయంగా అతని భార్య అనుకోవచ్చు. ప్రజలూ, మనం కూడా ఆ సమయంలో అనుకోవచ్చు. ఇంతలోనే బ్లెయిర్ వ్యూహం మారుస్తాడు. చివరి దృశ్యంలో రాణీ దగ్గరకు వెళ్లి మామూలుగా ఎందరో ప్రధాన మంత్రులు చేసిన పధ్ధతిలో ‘చెప్పండి చేస్తాను ‘ అన్నట్లు రాయల్ పేలెస్ లాన్ లో ఆవిడ వెనుక నడుస్తాడు. రాజకీయాలలో జనరంజకమైనది అందరికీ ఆమోదమే-అది కుర్చీని తెచ్చి కూర్చోపెడుతుంది. ఆ తరువాత ఆ నిలబడ వలసిన నిజాన్ని కూడా అందులోనే కూర్చోపెట్టి క్రమంగా పడుకోపెట్టటం కూడా అలా క్షణంలో జరిగిపోతుంది. వైపరీత్యం చూపించిన ఏ కథైనా పలు కాలాలు నిలబడిపోవటం కూడా ఒక వైపరీత్యమే కదా?!
ఎలిజబెత్ రాణి వెళ్లాలా వద్దా అనే అంశం మీద మథన పడుతూ ఆమె వాహనం ఆగిపోయినప్పుడు ఒక జింక గురించి ఆలోచిస్తుంది. తన మనుమళ్లు కోరుకున్నారు కదా అనుకుంటుంది. ఇంతలో ఒక బులెట్ శబ్దం వినిపించి దానిని తప్పించే ప్రయత్నం చేస్తుంది. కానీ తరువాత మరల అక్కడికి వెళ్లినప్పుడు దానిని ఎవరో వేటాడేశారని తెలుసుకుంటుంది.
డయానా, జింక సింబాలిసం కొద్దిగా బాధనే మిగిలుస్తుంది.
రాణీ గారు డయానా అంత్యక్రియల సమయంలో అక్కడ ఉన్న ప్లేకార్డ్లను చూస్తూ వెళుతుంది. ‘ మా రక్తం త్రాగావు ‘ అని ఒక చోట ఉంటుంది. అన్నీ చూశాక ప్రజల వైపి ఆవిద తిరుగుతుంది. ఒక చిన్న పిల్ల ఒక పుష్ప గుఛ్చాన్ని పట్టుకుని ఉంటుంది. ‘ నా చేతి మీదుగా డయానాకు ఇవ్వవా? ‘, అని ఆవిడ అడుగుతుంది. అ పాప ‘ నో…’ అన్నప్పుడు ఆవిడ ముఖంలో రంగులు మారిపోతాయి. వెంటనే ఆ పాప ‘ ఇది నీ కోసం ‘ అని చేతికి ఇస్తుంది…ఈ దృశ్యం గొప్పది! బ్రిటన్ చరిత్రను ఒక్క మాటలో చెప్పాడు దర్శకుడు!
~~~***~~~
హెలెన్ మిరెన్ ఎలిజబెత్ రాణిగా, మైకెల్ షీన్ టోనీ బ్లెయిర్ గా, ఎలెక్స్ జెనింగ్స్ ఛార్లెస్ గా నటించిన ఈ చిత్రానికి దర్శకుడు స్టిఫెన్ ఫియర్స్. ఇది ఎన్నో అవార్డులు పొందిన చిత్రం. రాణీగా మరో సారి (ఈమె పలు సార్లు ఆ పాత్రలో మనకు ఇతర చిత్రాలలో కనిపించారు) ఎంతో సహజంగా, హృద్యంగా నటించిన హెలెన్ మిరెన్ ఉత్తమ నటిగా అకాడమీ అవార్డు పుచ్చుకుంది.
~~~***~~~
రాజకీయాల మీద చాలా మంది చిత్రాలను రూపొందించాలని అనుకుంటారు. ఘటనకీ, సంఘటనకీ గల సంబంధం ఎక్కడా అని యోచిస్తే ప్రక్రియలు ముందుకు వస్తాయి. మూడూ సంగమించిన చోట ఒక భావోద్రేకం సుడిగుండం లా తిరుగుతుంది. ఒక నాటకీయత అక్కడే…ఆ సంఘటనతోనే పైకి ఉప్పెనలా లేస్తుంది.
…దటీస్ మువీ మేకింగ్!
~~~***~~~
12-18 అక్టోబర్ 2009 రాశిఫలాలు-వేదాంతం శ్రీపతి శర్మ
12 అక్టో 2009 అభిప్రాయములు
in శ్రీ-ఫలములు
శ్లో: శ్రీరామచంద్ర: శ్రితపారిజాత:
సమస్తకళ్యాణగుణాభిరామ:
సీతాముఖాంభోరుహచంచరీక:
నిరంతరం మంగళమాతనోతు
ఈ వారం గ్రహస్థితి: రవి కన్య, తుల రాశులు, బుధుడు, శని, శుక్రుడు కన్య, గురు రాహువులు మకరం, కుజ కేతువులు కర్కాటకం, చంద్రుడు కర్కాటక, సింహ, కన్య రాశులు సంచరిస్తారు.
మనసులో ఉన్న అలజడులు మాసిపోయి సరైన దృక్పథాలు ఏర్పడు వారం ఇది. చాలా మందికి గతం నుంచి తోసుకుని ముందుకు వెళ్లి మంచి పనులు చేయాలనే తపన ఈ వారం కలుగవచ్చును. విషజ్వరాలు బాధించగలవు. జాగ్రత్త వహించవలసిన అవసరం ఉన్నది.
మేషం: ఇంటిలో ప్రశాంతత చిక్కుతుంది. బంధువులతో గడుపుతారు. ఆశ్చర్యకరమైన సంఘటనలు జరుగవచ్చు. మంచి పుస్తకాలు చదవండి. సుబ్రహ్మణ్య కవచం చదవండి.
వృషభ రాశి: ఇతరుల తప్పులు ఎత్తి చూపకపోవటం ఎంత మంచిదో ఈ వారం గ్రహిస్తారు. డబ్బు సకాలానికి అందుతుంది. సోదరుల సహకారం లభిస్తుంది, లాభిస్తుంది కూడా! లక్ష్మీ అష్టోత్తరం చదవండి.
మిథున రాశి: ఆలోచనలు కలసి వస్తాయి. కొంత సహనం అవసరం. తాత్విక చింతన ఒక వైపు, అదృష్టం కలసి రావాలని మరో వైపు చిత్రంగా కనిపిస్తాయి. ధ్యాన మార్గం మంచిది.
కర్కాటక రాశి: కొత్త చదువులు ప్రారంభించే వారికి మంచి వారం. నూతన పరిచయాలు ఏర్పడ గలవు. ఆత్మ విశ్వాసం పెరుగుతుంది. నూనె వస్తువులతో జాగ్రత్త వహించాలి. విష్ణు సహస్రనామం చదవండి.
సింహ రాశి: ఒక రాజయోగం ఉన్నది. ఉన్నత అధికారుల మెప్పు, పదోన్నతి, బదిలీ అన్నీ అనుకోకుండా జరుగుతాయి. ఒక సమస్య సమాధానం వైపు సాగుతుంది. దంతాలు బాధిస్తాయి. ఆదిత్య హృదయం చదవండి.
కన్య రాశి: మీరు జీవితంలో కొత్త మలుపు తిరగనున్నారు. మరొకరి సహాయం కోరే ముందు మీరే ఎందుకు చేయలేరనేది సమీక్షించుకోండి. మీలోని అంతర్లీన మైన శక్తి బయటకు వస్తుంది. మీ సహనం మెప్పు పొందుతుంది. శ్రీసూక్తం చదవండి.
తుల రాశి: ఖర్చులు పెరగనున్నాయి. విదేశాల నుంచి ఒక నిరాశాజనకమైన వార్త వినగలరు. మీ పెట్టుబడులు పదిలంగానే ఉంటాయి. మిత్రులు సహాయం కోరుతారు. హనుమాన్ చాలీసా చదవండి.
వృశ్చిక రాశి: రాజకీయాలలో ఉన్న వారికి చక్కని అవకాశాలు ఉన్నాయి. కొందరు పార్టీలు మారవచ్చు. కొందరికి మంచి పదవులు లభించగలవు. స్త్రీలు ముందుకు దూకుతారు. రసాయన శాస్త్రం లో నిపుణులకు మంచి గుర్తింపు లభించగలదు. దుర్గా సప్తశ్లోకీ చదవండి.
ధను రాశి: భయాందోళనలు దూరం అవుతాయి. సంతానం లేని వారికి మంచి కాలం. ప్రయత్నాలు ఫలించగలవు. దాన గుణం మిమ్మల్ని కాపాడుతుంది. బంధువుల మెప్పు పొందుతారు. శ్రీ దత్త స్తవం చదవండి.
మకర రాశి: దూరం ఆలోచించి దగ్గర వస్తువును పోగొట్టుకోగలరు. దగ్గరున్నవి చక్క పెట్టుకొనండి. ఆదాయం పెరిగే సూచనలున్నాయి. ప్రయాణాలలో జాగ్రత్త వహించాలి. లింగాష్టకం చదవండి.
కుంభ రాశి: బాధ్యతల వలన కొంత చిరాకులు ఉండవచ్చు. ఈ వారం మీ ఆస్తుల విషయం పరిష్కారం కావచ్చు. కళాకారులకు ఇష్టం లేని అవకాశాలు రాగలవు. వ్యాపారస్తులకు ఈ వారం కొన్ని ప్రభుత్వ సంబంధమైన సమస్యలు తలెత్త గలవు. గోవులకు గ్రాసం వెయ్యండి.
మీన రాశి: వివాహం వైపు ఆలోచిస్తున్న వారు మంచి లాభాలు పొందగలరు. జీవితాన్ని ఒక్కో రోజుగా జీవించే వారు భవిష్యత్తుకు చక్కని ప్రణాలికలు వేయగలరు. కొంత విలాసానికి వెచ్చిస్తారు. కొందరికి ఉద్యోగంలో మార్పు ఉండవచ్చు. మహాసౌరం చదవండి.
ఈ వారం మంచి మాట:
‘ అహమస్మి…జ్యోతిరహమస్మి, బ్రహ్మా అహమస్మి! ‘
(అఘమర్షణ సూక్తం)
అందరికీ వెలుగుల పండుగ దీపావళి శుభాకాంక్షలు!
సర్వే జనా: సుఖినో భవంతు!
ఓం శాంతి: శాంతి: శాంతి:
~~~***~~~
The English version is available at www.sripati.com
ఈ వంతెన గొడవేమిటి?-వేదాంతం శ్రీపతి శర్మ
07 అక్టో 2009 వ్యాఖ్యానించండి
in శ్రీ-సరదాలు!
When the War-Khasis tribe needs a new bridge to cross one of the many criss-crossing rivers of the cherrapunji region, they don’t build one. They grow it.
The root bridges, some of which are over a hundred feet long, take ten to fifteen years to become fully functional, but they’re extraordinarily strong – strong enough that some of them can support the weight of fifty or more people at a time.
Because they are alive and still growing, the bridges actually gain strength over time – and some of the ancient root bridges used daily by the people of the villages around Cherrapunji may be well over five hundred years old.
ఈ వంతెనలు ఎక్కడ కనిపిస్తాయి? దేనితో చేస్తారు? (మళ్లీ వెర్రి మొదలయింది!-వేదాంతం శ్రీపతి శర్మ)
05 అక్టో 2009 అభిప్రాయములు
in శ్రీ-సరదాలు!
‘ గుడ్ సెన్స్ అండ్ నాన్ సెన్స్-విత్ అపాలజీస్ టు నన్’, డాక్టర్ బి. దయానంద రావ్ గారి పుస్తకం మీద వేదాంతం శ్రీపతి శర్మ కబుర్లు
04 అక్టో 2009 1 వ్యాఖ్య
in శ్రీ-విద్య
డాక్టర్ దయానంద రావు గారు ఒస్మానియా మెడికల్ కాలేజీ ప్రిన్సిపాల్ గా చేసి రిటయిర్ అయ్యారు. ఆయన వృత్తి న్యూరో సర్జరీ. ‘ నో అగ్లీ స్కార్స్ ‘ అనే ఆత్మకథ, కర్ణాటక సంగీత వాగ్గేయకారుల చరిత్ర సంకలనంగా మరో పుస్తకం రచించారు. ఈ గుడ్ సెన్స్…పుస్తకం ప్రచురించిన సంవత్సరం-1997 లోనే ఆయన కన్ను మూశారు.
కొన్ని సంవాదాలను ఎంచుకుని ఆయన ఒక లైటర్ వెయిన్ లో మాటలలోనే గారడీ చేస్తూ చాలా అంసాలను ఆలోచింప జేసే విధంగా ముందుకు తెచ్చారు. ఉదాహరణకి కొన్ని శీర్షికల పేర్లు చెబుతాను:
టు స్వేర్ అండ్ సిన్ ఆర్ సిన్ అండ్ స్వేర్, వార్ ఫుటింగ్, మై ఫుట్!, వెన్ వైస్ వస్ వర్ట్యూ…ఇలా 23 శీర్షికలుంటాయి.
ప్రతి శీర్షికలో ఓ నలుగురు కూర్చుని మాట్లాడుకుంటారు. మాటలు సాగుతుండగా మామూలుగా అందరూ మాట్లాడుకునే మాటలే ఉన్నయి అనిపించినా రక రకాల నేపథ్యాలు గల వాళ్లు అక్కడ ఉండటం వలన ఈ మాటకు అర్థం వేరండీ అని చెప్పటంతో ఒక హాస్యాస్పదమైన పరిస్థితి ఏర్పడుతుంది. రచయిత నేర్పు ఇక్కడే కనిపిస్తుంది. మరో వ్యక్తి ఆ హాస్యాస్పదమైన విషయాన్ని మన రాజకీయ పరిస్థితులలో ఇది నిజమేనని నిరూపించటం జరుగుతుంది.
ముఖ్యంగా ఆంధ్ర ప్రదేశ్ లో ఈ రోజు ఉన్న ముప్పు-వర్ద బాధ గురించి (అప్పటి వరద బాధ) ఒక సన్నివేశం ఉన్నది. ఆ వివరాలు మీ ముందు ఉంచుతున్నాను-
ఇది ‘ వార్ ఫుటింగ్, మై ఫుట్ ‘ అనే శీర్షికలో ఉన్న విషయం. అక్కడ కూర్చున్న వ్యక్తులలకు సంబంధించిన ఒకరు వైజాగ్ లో చిక్కుకుని ఉన్నాడు.
ఒక వ్యక్తి అంటాడు-ప్రకృతి మనకు ఎన్ని అవకాశాలిచ్చినా ఒక్క పాఠం కూడా మనం నేర్చుకోము! ఏ ప్రభుత్వమైనా ఇంతే!
నిన్ననే మంత్రి గారన్నారు, మనం చేయ గలిగినది లేదు. వైపరీత్యాలు పెద్ద దేశాలను కూడా కొడుతున్నాయి. నేను ఇంత కంటే దారుణ మైనవి చూశాను. కాకపోతే ఇది దేశీయ విపత్తు కాదు!
ఇంకొక వ్యక్తి అన్నాడు-ఆయన వెంటనే ఒక సర్వే కోసం ఎయిర్ క్రాఫ్ట్ ఎక్కాడు. మన వాళ్లు, మన ముఖ్య మంత్రి ఇప్పటికే అలా వెళ్లారుగా?
ఎవరినీ నమ్మ కూడదు. కళ్లతో చూడాలి…
(ఈ రోజయితే హెలికాప్టర్ ఎక్కడానికి ఎవరూ ముందుకు రావటం లేదు )
చివరకు ఒక కమిటీ వేస్తారు. దొరబాబులు పండగ చేసుకుంటారు!
మరో వ్యక్తి అన్నాడు-ఇవన్నీ దండగ. ముందు సహాయ చర్యలు వార్ ఫుటింగులో జరగాలి. కాకపోతే వార్ లేనప్పుడు వార్ ఫుటింగ్ ఎలా వస్తుంది?
అక్కడ కూర్చున్న రెందవ ప్రపంచ యుధ్ధ సేనాని ఒకాయన మొదలెట్టాడు…
వార్ ఫుటింగ్ మై ఫుట్! మీరెవరూ యుధ్ధాన్ని చూడలేదు. వార్ ఫుటింగ్ అంటే మూడు విషయాలుండాలి. ఒకటి, సంగఠిత చర్యతో పాటు ఒక అర్జెన్సీ, రెండు, మనుషులు, మెటీరియల్…వీటిలో అతి తక్కువ వాడుకతో అతి ఎక్కువ సాధించటం, మూడు, ప్రజలను ఎంచుకున్న వ్యూహంలో పూర్తిగా పాల్గొన చేయాలి. వార్ ఫుటింగ్ అంటే అది అర్థం!
మొదటి దాని దగ్గరకు వద్దాం-సంఘటిత శక్తి ఏది? ఆ రోజుల్లో రెండవ యుధ్ధంలో విన్స్టన్ చర్చిల్ ఒక కొఏలిషన్ నడుపుతున్నా సంఘటితంగా యుధ్ధం చేశారు. తరువాత ఆయనను తిశేశారు. (రోశయ్య గారు తాత్కాలికమే కదా).
రెండవ దానికి వస్తే నలుగురు నాలుగు వైపులు పరుగులు తీస్తున్నారు.
మూడవ దానికి వస్తే స్థానిక ప్రజలు ఎక్కడైతే ఇబ్బందులలో ఉన్నారో అక్కడికి దగ్గరలో ఉన్న ప్రజలను రంగం లోకి దింపటం జరగదు. అది జరిగితే చాలా త్వరగా పనులు పూర్తి అవుతాయి…
వ్యాసం చివర ఒక మాట ఉంటుంది-సభ్యత పెరుగుతున్న కొలదీ యుధ్ధ నీతిలోనూ, సాంకేతిక పరమైన వాటిలోనూ మనుషులనూ సామాన్లనూ ఏరి పారేసే ప్రక్రియ కోసం ఎలాగైతే మార్పులుంటాయో, ఒక ప్రకృతి వైపరీత్యం నుంచి మరో ప్రకృతి వైపరీత్యం వైపు సాగుతున్నప్పుడు అంచనా వెయ్యటం లోనూ, అవలంబిస్తున్న పధ్ధతులలోనూ మార్పులు రావాలి. (ఇక్కడ మాటలో వైపరీత్యం ఉంటుంది. వినాశానికి వార్-వార్ ఫుటింగ్! ప్రకృతి చేసె నష్టం ఒకటి, వార్ నుంచి మనం చేసే విధ్వంసం మరొకటి).
ఆ సేనాని ‘ దయ చేసి వార్ ఫుటింగ్ అనే పద జాలాన్ని వాడకండి. అది ప్రకృతి వైపరీత్యానికి, విధ్వంసాన్ని ఆపటానికీ వాడకూడదు ‘ అంటాడు.
పోనీండి. వార్ అంటే హిందీలో ఒక అస్త్రాన్నో శస్త్రాన్నో ప్రయోగించటం. లేదా ఒక ఎత్తు వేయటం. ‘వారం ‘ అంటే సన్స్కృతం లో ‘ మరల ‘ అని అర్థం. అంటే మరల ఇది ఉంటుంది, మరల ‘ఇదే ‘ ఉంటుంది. ఇదే ‘వార్ ఫుటింగ్ ‘ అని కనిపిస్తోంది.
నిజాన్ని ఒక్క మాటలో చెప్పటం కష్టం కావచ్చు. నిజం కోసం అబధ్ధం చెప్పాలేమో! (ఆర్ట్ ఈస్ అ లెయి విచ్ రివీల్స్ ద ట్రుత్ ). అదీ అవసరం లేదు అనిపిస్తుంది. వాడుకలో మనం వాడుతున్న పద జాలాల అసలు వ్యుత్పత్తి వైపుకు వెళితే ఇప్పుడున్న వాడుకలో ఉన్న వైపరీత్యం, ఒక హాస్యాస్పదమైన విషయం, ఒక నిజం చక్కగా కనిపిస్తాయి.
సంవాదాల స్వరూపంలో ఉన్నప్పుడు ఇటువంటి విషయాలు మరింత ఆకట్టుకుంతాయి. ఆర్ట్ బుష్వాల్డ్ శైలి అందుకే అంత ప్రాచుర్యం పొందింది.
చిత్రం ఏమిటంటే ఆయన పేరమవుంట్ వారి మీద ఆయన విషయాన్ని ఎత్తేసినందుకు విజయవంతంగా కేసు చేశాడు. ఆ త్రౌవాత ఆయన ఒక మాటన్నాడు. ఇంత వరకూ ఆయనకు అన్ని విషయాలలో ఒక సెన్స్ ఆఫ్ హ్యూమర్ ఉండేది. ఆయన లాయర్ మొదటి బిల్లు ఇచ్చాక అది వెళ్లిపోయింది. అది కొన్ని వేల డాలర్లు. ఇది కేవలం ఫొటో కాపీయింగు కోసం అన్నారుట! అసలు బిల్లు వచ్చే సరికి ఆయన చాలా గట్టిగా నవ్వటం మొదలు పెట్టాడు. అదేమిటి? అంటే ‘ నేను చేయగలిగింది అదొక్కటే ‘ అన్నాడు!
‘ గుడ్ సెన్స్…’ పుస్తకం క్రెస్ట్ పబ్లిషింగ్ హవుస్ (జెయికో సంస్థ ) జి-2, 16 అన్సారీ రోడ్, దరియా గంజ్, కొత్త డెళీ-110 002 వారు ప్రచురించింది. దీని ధర 75 రూపయలే! ఈ పుస్తకం హిగ్గిన్ బాథంస్ లో నేను చాలా కాలం క్రితం కొన్నాను. వరద భీభత్సం చూసి ఈ శీర్షిక, అలాగే ఈ పుస్తకం గురించి చెప్పాలనిపించింది.
~ వేదాంతం శ్రీపతి శర్మ
4-10 అక్టోబర్ 2009 రాశిఫలాలు-వేదాంతం శ్రీపతి శర్మ
03 అక్టో 2009 అభిప్రాయములు
in శ్రీ-ఫలములు
శ్లో: శ్రీరామచంద్ర: శ్రితపారిజాత:
సమస్తకళ్యాణగుణాభిరామ:
సీతాముఖాంభోరుహచంచరీక:
నిరంతరం మంగామాతనోతు!
ఈ వారం గ్రహస్థితి:
రవి శనులు కన్య, గురు రాహువులు మకరం, కుజుడు మిథున కర్కాటక రాశులు, కేతువు కర్కాటకం, శుక్రుడు సింహం, బుధుడు సింహ కన్య రాశులు, చంద్రుడు మీన, మేష, వృషభ, మిథున రశులు సంచరిస్తారు.
దేశ కాల పరిస్థితులు క్షీణించు కాలం ఇది. అనుకోని ఇబ్బందులతో పాటు పొంచి ఉన్న శత్రువులు విజ్రుంభించగలరు. అసమ్మతి, అసంతృప్తి పలు చోట్ల సార్వజనికంగా కనిపించగలదు. అయినప్పటికీ ఆదాయం బాగానే ఉండగలదు. కొన్ని ఒప్పందాలు కుదరగలవు. రవి తుల రాశి దాటే వరకు ప్రకృతి వైపరీత్యం తప్పదని చెప్ప వలసి యున్నది. ప్రజలు నిరంతరం విష్ణు సహస్రనామం, శ్రీసూక్తం పారాయణ చేయటం మంచిది. భూమి సూక్తం వినాలి.
ప్రకృతి వైపరీత్యాలు ప్రజలను బాధ పెట్టు సందర్భాలు ఇక్కడ శాస్త్ర రీత్యా ఉదహరిస్తున్నాను:
1. గోవధ, గోహింస
2. ఋతు స్రావ సమయంలో కూడా స్త్రీలు మూల మంత్రములను జపించినా, దేవాలయాలలోకి ప్రవేశించినా
3. సదాచార సంపన్నులు కాని వారికి యోగ విద్యను ఉపదేశించుట జరిగినా
4. గురువు దగ్గర అభ్యాసము , గురువు అనుఙ్ఞ లేకుందా వైదిక విద్యను , శాస్త్రాలను ప్రవచించినా
5. పెద్దలను, గురువులను దూషించినా
6. ధర్మాన్ని విస్మరించి ప్రవర్తించినా
7. వైదిక ఙ్ఞానమును దురుపయోగం చేసినా లేక నిర్ణీతమైన పధ్ధతిలో ఆచరించకపోయినా
8. రాజు (ప్రభుత్వం) అవినీతిని ప్రోత్సహించినా
9. అమాయకులు, బలహీనులు ద్:ఖించించినా
10. ప్రజలు సూర్యోపాసన చేయకున్నా
…ఇవి ప్రస్తుత కాలానికి సరిపోవు విషయాలు మాత్రమే!
ఇంటింటా ధర్మ మార్గం వైపు ప్రజలు నడచు పధ్ధతిని సూటిగా, గట్టిగా నిర్దేశించ వలసిన అవసరం పెద్దలకు ఉన్నది. జనరంజకంగా ఉండు తత్వాలు, మనోరంజకంగా ఉండు విషయాలు ప్రాచుర్యం కోసం వివిధ మాధ్యమాల ద్వారా చెప్పి వంకర భాష్యాలను చాటి పేరు తెచ్చుకునే ఒక చెడు వ్యవస్థ ఈ రోజు ఏర్పడినది. ఇది సనాతన సంప్రదాయానికి జరుగుతున్న తీరని అనాదరం. ప్రజలు గమనించగలరు!
‘ అగ్నిరివ కక్షం దహతి బ్రహ్మ పృష్ఠమనాదృతం ‘
-ఇది వేద వాక్కు. వైదిక విద్యతో అనాదరంగా వ్యవహరించినపుడు అది అడవిలో దావానలంలా దహించి వేయగలదు…
~~~***~~~
మేష రాశి: వారాంతంలో ఆరోగ్యం జాగ్రత్తగా చూసుకోవాలి. ఆదాయం బాగుంటుంది. ఒక మంచి వార్త వింటారు. దైవ చింతన అవసరం. వస్తువులను సేకరిస్తారు. బట్టలు కొనుగోలు చేస్తారు. సుబ్రహ్మణ్య కవచం చదవండి.
వృషభ రాశి: పోటీలు, పోట్లాటలకు దూరంగా ఉండవలసిన వారం. గతంలో మీరు వేసిన కొన్ని లెక్కలను సరిదిద్దుకుంటారు. కొత్త వ్యక్తులు పరిచయం అవుతారు. ఆహార నియమాలు పాటించండి. అల్సర్లు ఏర్పడ వచ్చు! మహాసౌరం చదవండి.
మిథున రాశి: చర్మం విషయంలో జాగ్రత్త వహించాలి. సత్కార్యాలు చేపట్టవలసిన వారం. ఇంటి మీద పెట్టిన ఖర్చులు మంచి ఫలితాలిస్తాయి. మీ ఓర్పు మీ నేర్పుగా కనిపిస్తుంది. ఒక ప్రయాణానికి ఆహ్వానం అందగలదు. ప్రయాణం పూర్తిగా మానుకొనుట మంచిది. నాగ పడిగకు అభిషేకం చేయండి.
కర్కాటక రాశి: కుటుంబ సభ్యుల విలువ తెలుసుకుంటారు. ఆహారం సరిగ్గా తీసుకొన పోవుట వలన సమస్యలు ఉండవచ్చు. ఉద్యోగస్తులకు మంచి వార్తలున్నాయి. శత్రువులను జయిస్తారు. మరచిపోయిన పని ఒకటి గుర్తుకు వస్తుంది. రుద్రం పారయణ చేయండి.
సింహ రాశి: మీ తప్పును తెలుసుకుంటారు. అయినా ఒప్పుకోరు. అది మీ నైజం! వారం మధ్యలో ఒక వివాదం తలెత్త గలదు. ధోరణి ఆలోచనల వలన ఇబ్బందులకు గురి కాగలరు. కుడి కంటిలో సమస్య కనిపిస్తున్నది. ఒక బాధ్యతను విస్మరించారని తెలుసుకుంటారు. విష్ణు సహస్రనామం చదవండి.
కన్య రాశి: ఋణం పొందుతారు. పై అధికారుల సహాయం పొందుతారు. స్త్రీ వలన లాభం ఉన్నది. ఒక ప్రయాణం తప్పదు. ప్రయాణం వలన లాభం కూడా పొందుతారు. శ్రమ తప్పదు. మీ ఉత్సాహాన్ని ఇతరులు అపార్థం చేసుకోగలరు. కళాకారులకు మంచి వారం. శ్రీసూక్తం చదవండి.
తుల రాశి: మీ చుట్టూ ఉన్న మిత్ర బృందంలో కొంత అలజడి ఉండవచ్చు. ఒక నూతన పరిచయం చాలా దూరం వరకు సాగవచ్చు. ప్రేమ వ్యవహారం ఉన్న వారికి కథ ముందుకు సాగుతుంది. బంధు వర్గంలో భిన్నాభిప్రాయాలు కలుగగలవు. వారాంతంలో ఒక వార్త కలవర పెట్టగలదు. లలితా సహస్రనామం చదవండి.
వృశ్చిక రాశి: సమస్యల పరిష్కారానికి చర్చలు చేయాలనుకున్న వారు ఈ వారం ఆ పనిలో ఉండటం మంచిది. భూ వివాదాలు పరిష్కారం కాగలవు.విదేశాల నుంచి మంచి అవకాశాలు రాగలవు. కొందరు వ్యక్తుల గురించి స్పష్టంగా తెలుసుకుంటారు. అష్టలక్ష్మీ స్తుతి చేయండి.
ధను రాశి: పిల్లలు మీ దారికి రాగలరు. వ్యాపారం అభివృధ్ధిలోకి వస్తుంది. పెట్టుబడులు లాభించగలవు. కాకపోతే కొత్త పెట్టుబడులకు సమయం పడుతుంది. ఉపాధ్యాయులకు మంచి అవకాశాలున్నాయి. కార్యాలయంలో కొంత విముఖత ఏర్పడగలదు. హనుమాన్ చాలీసా చదవండి.
మకర రాశి: రక్త హీనత వలన ఇబ్బందులు ఉండగలవు. జీవితభాగస్వామి ఆరోగ్యం జాగ్రత్తగా చూసుకోవాలి. స్థిరాస్తి కలసి రాగలదు. వ్యసనములకు దూరంగా ఉండవలసిన వారం. మీ సహచరుల ప్రోత్సాహంతో కొత్త పని ప్రారంభించగలరు. దుర్గా సప్తశ్లోకీ చదవండి.
కుంభ రాశి: ఈ రాశి వారికి ఇది బహు కాలంగా ఆగిపోయి ఉన్న పనులు పూర్తి కాగల వారం. నిరుద్యోగులకు మంచి ఉద్యోగం లభించగలదు. పెద్దల ఆశీర్వాదం పొందుతారు. కొన్ని విషయాలలో పట్టు విడుపు అవసరం. నూతన సమాచారానుసారం మీ ధోరణి మార్చుకోవలసి ఉండవచ్చు. లక్ష్మీ అష్టోత్తరం చదవండి.
మీన రాశి: భార్యా భర్తల మధ్య కొందరు దూరటం జరగ వచ్చు. జాగ్రత్త వహించవలసి యున్నది. ఉబ్బసం ఉన్న వారు ఆరోగ్యం పట్ల శ్రధ్ధ వహించాలి. ఒక సభలో మాట్లాడ వలసి ఉంటుంది. విద్యార్థులకు , పరిశోధనలు చేయు వారికీ ఇది మంచి వారం.లింగాష్టకం చదవండి.
ఈ వారం మంచి మాట:
శ్లో: ధర్మాదర్థ: ప్రభవతి ధర్మాత్ ప్రభవతే సుఖం
ధర్మేణ లభతే సర్వం ధర్మ (సార ) మూలమిదం జగత్
(శ్రీమద్ వాల్మీకి రామాయణం
అరణ్య కాండ )
ధర్మపాలనమున అర్థకామప్రాప్తి కలుగును. ధర్మము సర్వ సుఖ మూలము.ధర్మమునకు అప్రాప్యమేదియు లేదు. ఈ జగత్తంతయును ధర్మసారభూతము.
సర్వే జనా: సుఖినో భవంతు!
ఓం శాంతి: శాంతి: శాంతి:
~~~***~~~
The English version is available at www.sripati.com
‘ డెఫినిట్లీ, మే బి’ చిత్రం మీద వేదాంతం శ్రీపతి శర్మ కబుర్లు
02 అక్టో 2009 1 వ్యాఖ్య
in శ్రీ-చిత్రం
ఒక పాత్రకు చూపిస్తున్న వృత్తి, ప్రవృత్తి ఒక్కో సారి చిత్రం లోని కథకు చాలా ఉపయోగ పడగలవు. రాజకీయ రణరంగంలో ప్రచార మాధ్యమంలో ఒక నాయకుని గెలుపు కోసం పని చేస్తున్న వ్యక్తి ఈ చిత్రంలో కథా నాయకుడు. ఇప్పటికే ఈ పాత్ర ఎంత పరుగులు తీస్తుంది అనేది స్పష్టమవుతుంది. ఎన్నికల నేపథ్యం. ఇతను విడాకుల వ్యవహారంలో ఉన్నాడు. కూతురును వారానికి రెండు సార్లు కలుసుకోగలుగుతాడు. ఆ పిల్లకు కొత్తగా స్కూలు లో శృంగార ప్రక్రియల మీద క్లాసులు ప్రారంభమైనాయి. తండ్రిని అతని చరిత్ర గురించి
అడుగుతుంది. ఈ సినిమా మొత్తం అతను చెప్పటం, మధ్యలో పిల్ల ఆపటం ఇలా సాగిపోతుంది. చివరకు తిరిగి ఏప్రిల్-అతని భార్య వద్దకు ఆ పిల్ల తీసుకుని వెళుతుంది.
ఈ చిత్రంలో కొన్ని సన్నివేశాలు బాగుంటాయి. తండ్రి చెబుతున్న స్త్రీ పాత్రల నుంచి తన నిజమైన తల్లి ఎవరు అని ఆలోచిస్తున్న పిల్ల తండ్రి తనను తల మీద నుంచి చెంపల మీదుగా జుట్టును నిమిరే ఆమెను తల్లిగా గుర్తించటం ఆకట్టుకుంటుంది.
బిల్ క్లింటన్ అనుచరులతో జాగింగు చేస్తుండగా ఇతను ‘ నేను మీ గెలుపు కోసం కృషి చేశాను ‘ అని చెబుతుండగా వాళ్లు మామూలుగా వాళ్ల దారిన వాళ్లు వెళ్లిపోవటం…ఇలాంటివి దర్శకుడు జాగ్రత్తగా చిత్రీకరించాడు.
ఈ చిత్రాన్ని విమర్శకులు ఒమాంటిక్ కామెడీ అని వర్ణించారు. కాకపోతే గంభీరమైన అంశాలు ముందుకు వచ్చాయి. ముఖ్యంగా రాజకీయాలు, సార్వజనిక జీవితాలు-ఇవన్నీ చివరకు కేవలం శారీరిక పరమైన కామవాంఛలే అని తేల్చినట్లు కనిపిస్తాయి. జారిపోతున్న విలువలు, దిగజారిన భాషా ప్రవృతులు ముందుకు వచ్చాయి. ఒక ప్రాచుర్యం పొందిన రచయిత కూడా ఈ ప్రక్రియలో భాగమేనని కనిపిస్తుంది. అమ్మాయి శృంగారం గురించి తెలుసుకునే తరుణంలో తండ్రి చరిత్రలోని ముగ్గురు అమ్మాయిల గురించి తెలుసుకుని ఇంకా మిగిలి ఉన్న ఆమె వద్దకు తీసుకుని వెళ్లటం ఒక వైపరీత్యం గల కథనం. చక్కని కుటుంబ జీవితాన్ని మించిన సుఖం, చదువు, విఙ్ఞానం ఎక్కడా లేవన్నది ఈ పిల్ల చెప్పకనే చెబుతున్నది. నాకు జరిగిన అతి విలువైన సంఘటన నువ్వేనని అతను తన కూతురుకు చెబుతాడు…
నోబెల్ లారియట్ విలియం గోల్డింగ్ గారి నవల ‘ ద పేపర్ మెన్ ‘ ఒక సారి గుర్తుకు వచ్చింది.
ఈ చిత్రం చాలా వేగంగా జరుగుతుంది. నేపథ్య సంగీతం ఆహ్లాదకరంగా ఉంటుంది. సంవాదాలు తమాషాగా ఉంటాయి.
2008 లో వచ్చిన ఈ చిత్రం దర్శకులు ఆడం బ్రూక్స్. ఇందులో రియాన్ రినోల్డ్స్, ఇస్లా ఫిషర్, రాచెల్ వీష్, ఎలిసబెత్ బేంక్స్, అబిగైల్ బ్రెస్లిన్ నటించారు.
మన వ్యవహారాల మీద మనం ఒక సారి నవ్వుకుంటూనే మన అస్తిత్వాన్నీ, జీవితం లోని విలువలని గుర్తు చేసుకునే సందర్భం ‘ డెఫినిట్లీ, మే బి’ చిత్రం సృష్టిస్తుంది.
~~~***~~~
‘ నిన్న లేని అందమేదో’ (26వ భాగం)-వేదాంతం శ్రీపతి శర్మ
02 అక్టో 2009 వ్యాఖ్యానించండి
in శ్రీ-రచనలు
దూరంగా కొండల చాటు నుండి సూర్యోదయం అవుతూ ఉంది. లోయ ప్రాంతంలో మరో రోజు ప్రారంభం అవుతూ ఉంది.
శరత్ లేచి గది లోంచి బయటకు వచ్చి చూశాడు. పిట్ట గోడ దగ్గర ‘ ఆదుర్దా ‘ నిలబడి చూస్తున్నాడు. క్రిందటి రాత్రి అక్కడ పడుకున్న కుర్రాళ్లు వెళ్లిపోతినట్లునారు. అక్కడ రెండు కుర్చీలు, ఒక టీ పాయి ఉన్నాయి.
‘ ఇవెవరు వేశారు?’, అడిగాడు. అతను వెనక్కి చూశాడు.
‘ ఈ గెస్ట్ హవుస్ కుర్రాడనుకుంటాను. వచ్చి పెట్టి వెళ్లిపోయాడు. అన్నట్లు కాఫీ అడిగాడు. మీరు ఇంకా లేవలేదు, ఆగమన్నాను ‘
‘ మళ్లీ వస్తే కాఫీ తెమ్మనండి. నేను తయారయి వస్తాను. ‘
శరత్ లోపలికి వెళ్లిపోయాడు. పనులు ముగించుకుని మరల వచ్చాడు. ఇద్దరూ కూర్చున్నారు. కాఫీ పెట్టి కుర్రాడు నిలబడ్డాడు.
‘ ఏంటి? ఇంకా ఒక రోజు ఉంటాను ‘
‘ కాదు సార్. మీకు టిఫినీ ఏమి కావాలో కనుక్కోమన్నారు ‘
శరత్ అతని వైపు చూశాడు. అతను నవ్వాడు.
‘ నన్ను చాయిస్ అడుగుతున్నారా? సిగ్గుగా ఉంది ‘
‘ సిగ్గెందుకని? భలే వారే?’
‘ ఏదైనా అడగచ్చా?’
కుర్రాడు ఏమీ మాట్లాడలేదు.
‘ ఏవయ్యా?’
‘ అన్నీ దొరుకుతాయి సార్!’
‘ అల్లం గట్టిగా వెయ్యి. అలాగే పచ్చి మెరపకాయలు దంచుకో…’
‘ పెసరట్టా సార్?’
‘ దటీస్ తెలుగు టాలెంట్!’
శరత్ నవ్వాడు. ‘ నాకూ అదే! వెళ్లు. ‘
కుర్రాడు వెళ్లిపోయాడు. ‘ నిన్న రాత్రి కుర్రాళ్లతో మీరు చాలా చిత్రంగా మాట్లాడారు. మీ ఆలోచనలు మామూలు ఆలోచనలకు విరుధ్ధంగా ఉన్నాయి. అన్నట్లు మీరు రాత్రి సరిగ్గా పడుకున్నారా?’
అతను కాఫీ మెల్లగా తాగుతున్నాడు. ‘ నిద్రకేమి లెండి. బాగానే పడుకున్నాను. ‘
‘ నాటకాలు వగైరాలు అన్నారు. ప్రస్తుతం ఏమి చేస్తున్నారు?’
‘ కొందరితో నిజమే చెప్పాలనిపిస్తంది. నా అసలు పేరు సుందరం. ఒక పేరు మోసిన సినీ రచయితకి డమ్మీగా వ్రాస్తూ ఉంటాను. నేను చనిపోయి చాలా కాలమయింది…’
శరత్ ఆ మాటకు కుర్చీలో వెనక్కి వాలాడు.
సుందరం కాఫీకి తోడ పెళ్లికొడుకులాగా సిగరెట్ తీశాడు.
‘ అదోలా చూడకండి. నా పాదాలు సరిగ్గానే ఉన్నాయి. నా ఏజి స్టేజి మీదనే అయిపోయింది. దానినే నమ్ముకుని కాలం గడిపేశాను…’
‘ పెళ్లి లాంటిది…’
‘ హ…అలాంటిదాని దగ్గరకే వస్తున్నాను. జీవితం చిత్రమైనది శరత్ గారూ…మేరు పర్వతం దగ్గర అన్ని ఋతువులూ ఒక్క సారి కనిపించే ద్వీపం ఉన్నదని చెబుతారు. అలా కూడా అక్కరలేదు. నాకు శరత్ కాలమో వసంతకాలమో నిత్యం ఉండే జీవితం కనిపించదు!’
‘ ఏమయింది సుందరం గారూ?’
‘ ఏమిటో శరత్ గారూ…గతం లోకి వెళ్లిపోయి బూజులు దులిపి ఇదే ఒక కావ్యం, నా స్వగతం అని ఊరుకున్నంత మాత్రాన నా వర్తమానం తెల్లవారదు. నాకు బూజుతో పని లేదు, మరో రోజుతోనే పని అనుకుని భవిష్యత్తు వైపు చూస్తూ కూర్చున్నా ఈ గతం లోకి ఇలాగే ఈ రోజు జారిపోకుందా ఉండదు. ఈ తెరలు తెరలుగా తిరిగిపోయే ఈ కాల మహిమను ఎవరు కనిపెట్టారో కానీ నా కథ మీద నుంచి తెర తీయాలని నాకెందుకో అనిపించదు. అసలు తెర వెనుక, దాని ముందు ఉన్నదంతా అబ్ధ్ధమే! రెండిటి మధ్య ఉన్న ఈ తెర ఒక్కటే నిజమనిపిస్తుంది. ‘
‘ అసలు తెర అనేది ఎవరు కనిపెట్టారు?’
సుందరం నవ్వాడు.
‘ దేర్ యు ఆర్! మనిద్దరం ఏ జన్మలోనో కవలపిల్లలం అయి ఉంటాము! అద్దాన్ని కనిపెట్టిన వాడే మన గొడవలకు అద్దం పట్టాలని ఒక్క అడ్డు తెర కూడా కనిపెట్టి ఉంటాడు. జాగ్రత్తగా ఆలోచించండి. అసలు ఒక ఆలోచనని కని దాచి పెట్టి పొదగనిచ్చి వికసింపచేసే నాటక ప్రక్రియకు తెర అనేది మాతృక! అది మౌనం గానే మసలుకుంటుంది. మాసిపోతుంది…ఏమిటి సార్, ఆలోచిస్తున్నారు?’
‘ ఏమీ లేదు. మీ మాటలే ఒక ఆలోచింపచేసే గతానికి
ఒక వినూత్నమైన అడ్డు తెరలాగా ఉన్నాయి. ఈ తెరను ఎప్పుడు తీస్తారా అని ఆలోచిస్తున్నాను…’
సుందరం విరగబడి నవ్వాడు.
‘ నన్ను పిచ్చి వాగుడు ఆపి పనికొచ్చేది చెప్పమని ఎంత చక్కగా చెప్పారు సార్!’
~~~***~~~
ఆ హాల్లోని అందరి ముందూ లైట్స్ ఆఫ్ అయ్యాయి. తెర తెరుచుకుంది. స్టేజి మీద కూడా కొద్ది సేపు చీకటిగానే ఉంది. మెల్లగా కొంత కాంతి పెరిగి సుందరం మధ్యలోకి వచ్చాడు. ఆ కాంతి వస్తున్న వైపు చేయి అడ్డం పెట్టాడు.
‘ వద్దు…వద్దు. ఎవర్రా నా మీద ఫోకస్ చేస్తున్నారు? ఉన్నోలకి పనీ పాటా లేదు. పొద్దూకులా గరిబోడి మీద ఫోకస్…స్టాప్ ఇట్ ఐ సే! ‘
లైటు ఆగిపోయింది. మరల మెల్లగా పెరిగింది.
పడుకున్న సుందరం లేచాడు.
‘ ఓ…సూర్యుడు మన మీదకి వచ్చాడా? రైట్! ఓ కొత్త రోజు, ఓ కొత్త నాటకం, అద్దీ…కళాకారుడికి అన్ని రోజులూ కొత్తే! ఒక్క జీవిత కాలంలో కొన్ని వేల జీవితాలను జీవించి చూప గలిగింది ఈ సృష్టిలో ఒక్క కళాకారుడే! ఇదిగో ఈ చొక్కా చించి మరీ చెబుతాను…హ హ హ…దీనిని చింపక్కరలేదు! ఇది చిరిగే ఉంది…’
అక్కడక్కడ హాల్లో చిన్నగా నవ్వులు వినిపించాయి…
~~~***~~~
(తరువాయి భాగం త్వరలోనే)
ఇటీవలి అభిప్రాయములు