శ్రీ-పదములు

‘నీవన్నది, నీవనుకున్నది…’-వేదాంతం శ్రీపతి శర్మ

29 మార్చి 2009 1 వ్యాఖ్య

by srikaaram in శ్రీ-రచనలు

బస్సు మిస్సయింది. దాని వెంట పరుగు తీసి సర్కస్ లో లాగా అక్కడ ఫుట్ బోర్డు మీద వ్రేలాడుతున్న వారి చేయి పట్టుకుని విన్యాసాలు చేయలేను. కుంటుకుంటూ మరల బస్ స్టాప్ కి వచ్చాను. కుంటటం అంటే ఎందుకంటే కాలి చెప్పు కూడా అప్పుడే తెగింది. ఏమి చేస్తాము? భగవంతుడు కొందరి జాతకాలు నూనెలో నాంచి ఇవతలకి తీసి అప్పుడు గానీ వ్రాయడు! ఆయనకదో సరదా! చెన్నై చివర ఏదైనా రైలు బేసిన్ బ్రిడ్జ్ దగ్గర ఆగిందంటే ఆ రైలు ఏ రైలు అని ఎవరూ అడగరు. అది ఖచ్చితంగా సర్కారే! అలాగే ఏలినాటి శని అడుగు పెడుతున్నాడూ అంటే ఎలాగా? అని చూసుకోవక్కరలేదు. మా సుబ్బారావు గారు నన్ను చూడకూడదూ అనుకుంటుండగానే చూడటమే కాదు చక్కగా కళ్లజోడు సద్దుకుంటూ యుధ్ధ ప్రాతిపదుక మీద మీదకే వచ్చేస్టాడాయన!
అదేమి అలవాటో చేతిలోని సంచీతో నా చేయిని కొడతాడు. తరువాత పలుకరిస్తాడు.
‘ కుంటుతున్నావెందుకు? మోకాలు మూసుకుందా?’
కొంతమందికి ముందు మంచి మాట రానే రాదు. వారిలో ఈయన ముందుంటాడు! ఫలానా వాడు గుర్తున్నాడా? అని అడిగితే ,వెంటనే ‘ పోయాడా?’ అనగలరు.
‘ చెప్పు తెగింది సార్! ‘
‘ అయితే, కుంటటం దేనికి? ఇందులో సిగ్గు పడేదేముంది? చక్కగా రెండు చెప్పులూ చేతిలోకి తీసుకుని నడవ వచ్చును. జనం ఏమనుకుంటారు అని ఆలోచించటం వలన ఈ దేశంలో నూటికి తొంభై సమస్యలు…’

~~~***~~~

సుబ్బారావు సామాన్యుడు కాడు. తెలుగువారిలో మాన్యుడు. మొదటి సారి ఆయన బస్సులో నిలబడి ఉందగా నేను ప్రక్కన కూర్చుని ఉన్నాను. ఆయన పాంటుకు పెట్టిన బెల్టు పాపం సరిగ్గా లేదు. పర్టీ అభ్యర్థి పార్టీకి కట్టుబడి ఉండకుండా తప్పించుకుంటున్నట్లు ఆయన నడుముకు కట్తుబడకుందా దాని దారి అది చూసుకుంటోంది.

అయినా ఆయన ఒక చేత్తో పైన రాడ్ ను పట్టుకుని మరో చేత్తో పాంటు సద్దుకుంటూ ముందర నిలబడ్డ ఇద్దరి మధ్య సంవాదాన్ని ఆలకిస్తున్నాడు.
‘ మా ఏరియాలో పవర్ కట్ పొద్దున ఆరు నుంచి ఎనిమిది ‘
‘ ఏ ఏరియా?’
‘ మలక పేట ‘
‘ అలా ఎలా ఉంటుంది? అక్కడ ఎనిమిది నుంచి పది ‘
‘ కాదు ‘
‘ అరే! నేను చెబుతున్నాను ‘
ఇదీ సమస్య. తెలుగు వాడు దీని మీద పోట్లాడుకుంటాడు కానీ అసలు పవర్ కట్ ఎందుకు అనే విషయానికి రాడు. ఈయన అందరూ వినాలన్నట్లు గట్టిగా చెబుతున్నాడు,’ చార్మినార్, ఛత్రినాకాలో…సికిందరాబాదు మహంకాళీ గుడి నుంచి…’-మొత్తం అన్ని ఇలాకాలూ చెప్పేశాడు. ఆయన ఇబ్బంది చూసి లేచి సీటు ఇచ్చాను. కూర్చుని కళ్లజోడు సద్దాడు. ‘ యాభై, పంతొమ్మిదవ యాభైలో ఈ రకం బస్సులు వచ్చాయి…’
తరువాత ఏమి చెప్పాడో తెలియదు. నా స్టాపు కాకపోయినా దిగిపోయాను. ఆ బస్సు వెళ్లాక కొద్దిగా వెనక్కి తిరిగి చూశాను. చిత్రం ఏమిటంటే ఆయన ప్రక్కనున్నవాడిని లెక్క చేయకుండా కిటికీలోంచి నన్ను చూస్తూనే ఉన్నాడు. బ్రతికిపోయాననుకున్నాను!

ఒక రోజు స్థానిక లైబ్రరీలో నిలబడి ఉన్నాను. వెనుక నుండి వినబడింది,’ ఏమి చేస్తున్నారు?’
అటు తిరిగాను. ఇంక లాభం లేదనుకుని ‘ ఏముందీ? తూర్పున సూర్యుడు కిటికీలోంచి కనిపిస్తున్నాడు, అలా కొద్ది సేపు చూస్తున్నాను.’, అన్నాను.
వెంటనే ముక్కు మీద వేలు పెట్టాడు.’ నో! సూర్యుడు తూర్పులో ఉదయించడు!’
‘ సార్! ఇది టూ నచ్!’
‘ కాదు! ఏ దిక్కులోనైతే సూర్యుడు ఉదయిస్తాడో ఆ దిక్కును మనం తూర్పు అంటాం! అటు ఇటులో ఎంత పొరపాటు? ఆలోచించండి.’
నేను కూర్చుని పేపరు తీశాను. ఆయన అటు కూర్చుని ఇదే పేపరు గట్టిగా చదివాడు.
‘ దారుణం. వరకట్నం పుచ్చుకోవటం క్రైం అని మనం మరచిపోతున్నాం.’
‘ నిజమే సార్. వరకట్న చావులు ఎక్కువవుతున్నాయి!’
‘ అలా కాదండీ! మీరు కూడా ఆలోచించాలి. ఒక కూతురికి కట్నం ఇచ్చిన వారు కొడుకు దగ్గర పుచ్చుకోక పోతే ఎక్కడి నుంచి తెస్తారు? తేరగా వస్తోందన్న చోట పుచ్చుకోవటం ఘాతుకం. మీరు అస్సలు ఆలోచించటం లెదు మరి!’
నేను లేచి నిలబడ్డాను.’ మీరు ఎక్కడ పని చేస్తారు సార్?’
ఆయనా లేచి పాంటు పైకి లాక్కున్నాడు.
‘ సృష్టిలో చాలా చిన్నదిగా చూసే వృత్తి ఒకటే-అధ్యాపకులది. దీని తరువాత రాజకీయాలె! ‘

~~~***~~~

ఒక రోజు మా సందు చివార్న ఏదో గుంపు నడుచుకుంటూ వస్తోంది. ఏవో నిన్నాదాలు వేస్తున్నారు.
‘ ఎవరు వీళ్లు? ఏమి చేస్తున్నారు? అసలు ఏమిటి ఈ నాన్ సెన్స్?’ వెనుక నుంచి సుబ్బారావు గారు!
‘ ఏముందండీ? మీకు తెలియకపోవటం విచిత్రం. అధ్యాపకులు సమ్మె చేస్తున్నారు. జీతాలు చాలటం లెదట. మీ లాంటి వాళ్లు కూడా రోడ్డున పడితే ఎలా సార్?’
ఆయన వెంటనే కళ్లజోడు తీసేశాడు.నన్ను ఒక వింత జంతువును చూసినట్లు చూశాడు.
‘ పాయింట్ అది కాదు.అస్సలు తెలియటం లెదు మీకు. ఇది చాలా గొప్ప వృత్తి. వైదుని తరువాత టీచరే మరి సంఘానికి కావలసినది. అధ్యాపకుడు చీకటిలో నిలబడ్డా కొవ్వొత్తిలాగా కరగిపోతూ అందరికీ వెలుగును ప్రసాదిస్తాడు. జాగ్రత్త!’

~~~***~~~
 సుబ్బారావు గారు ఈ రోజు ఇలా నా చెప్పు తెగిన సమయంలోనే వచ్చి నా ప్రక్కన నిలబడి జనం గురించి ఎందుకయ్యా? చక్కగా రెండు చెప్పులూ చేతిలో పట్టుకుని నడవవచ్చుగా అని నీతులు చెప్పటం…సమయం బాగుండనప్పుడు ఇలా అన్నీ జరిగిపోతాయి. ఒక తిమింగలం లా మరో బస్సు ఒక వైపు ప్రపంచ ఆర్థిక వ్యవస్థ వొంగిపోయినట్లు వచ్చి నిలబడింది. సుబ్బారావు గారు పేంటు పైకి లాగి పరుగు తీశారు. అసలు ‘లాగూ ‘ అంటే ఈయనదే. లాగి పట్టుకోమనేదే లాగు అని అర్థం! ఆ బస్సు స్టాప్ దగ్గర కాకుండా కొద్దిగా దూరంగా ఆపాడు. హైదరాబాదా మజాకా? ఈయన పరుగు తీయగానే ఒక ‘తనుమధ్యమ ‘-చక్కని అలంకారంతో ఉన్న సుందరి తీరా అడ్డు వచ్చింది. ఈయన ఎదమ వైపుకు జరిగాడు. ఆమె కూడా అటే జరిగింది. కాదని మాష్టారు ఈ సారి కుడి వైపు జరిగారు. ఆమె కూడా అటే జరిగింది. ఇదరూ ఎదురూ బదురూ! ఇలా కొద్ది సేపు కబడ్డీ ఆడే వారిలా కనిపించారు. ఒక ఫ్రేం లొ చూస్తే ఒక రకమైన రాక్ నృత్యమని మనం విశ్లేషించుకోవచ్చునన్నమాట! ఇంతకీ అమ్మాయికి చిరాకు వచ్చి ఆయనను చిన్నగా తోసి పారిపోయింది. ఈయన కళ్లజోడు తీసేసి ఎవరయి ఉంటారా అని చూస్తున్నాడు. ఈ తరం లెక్చర్ ఎప్పుడు వినాలి? ఇటు తిరిగే సరికి బస్సు అలా రోడ్డు ఎక్కెసింది మరి. ఇటు వెనక్కి తిరిగి నన్ను చూశాడు. అసలు సంగతి అది కాదు. ఆ అమ్మాయి ఆయన ఎడమ కాలి చెప్పును తనతో లాగి ముందుకు దూకెసింది. దానితోటి అది తెగి నా తెగిన చెప్పు దగ్గర నా కాలి ముందే వచ్చి పడిపోయింది. నేను ఎన్.టి.ఆర్ (సీనియర్) రేంజీలో నడుము మీద చేయి పెట్టాను…

సుబ్బారావు గారు మెల్లగా ఒక చెప్పుతో కుంటుతూ నన్ను చేరుకున్నారు. నన్ను ఎందుకో కోపంగా చూశారు. చెప్పు తొడుక్కుని  కొద్ది సేపు దేశం గురించి ఆలోచించినట్లున్నారు!

‘ చెప్పు తెగినత్లుంది సార్?’
‘ …’
‘ ఫర్వాలెదు సార్! రెండు చెప్పులూ చేతిలోకి తీసుకుని దేవుడిచ్చిన పాదాలకు భూమి స్పర్స చేయించి ఎందుకు నదవ కూడదు?’
నేను కాళ్ల జోడు గురించి చెబితే వెంటనే కళ్ల
జోడు తీసేసారాయన.
‘ నాన్ సెన్స్! అసలు మీరు బొత్తిగా ఏమీ గమనించరు! ఎండ చూడండీ ఎలా ఉందో? పైగా అసలు విషయం మీకస్సలు అర్థం కావటం లేదు.
నా లాంటి వాడు చెప్పులు చేతులు పట్టుకుని రోడ్డు మీద నడిస్తే ఎమైనా ఉందా? నో!’

~~~***~~~

చాలా కాలం అయింది సుబ్బారావు గారిని చూసి. ఆ మధ్య అటు వైపు బస్సులో వెళుతుంటే ఉన్నట్టుండి కిటికీ లోంచి చూస్తుంటే దూరంగా ఎవరితోనో నడుస్తూ కనిపించారు. వింటున్న వాడి వైపు పూర్తిగా వొంగిపోయి చెబుతున్నారు. చాలా సేపు కనిపించినంత మేరకు చూశాను. ఇక బస్సు వెళ్లిపోతోంది. చివరికి పైకి లేచి వున్న ఆయన వేలొక్కటీ ఏదో పై లోకాలకి కూడా వివరిస్తూ ఉన్నట్లు కనిపించింది…

~~~***~~~

29.03.2009 నుంచి 04.04.2009 వరకు రాశి ఫలాలు-వేదాంతం శ్రీపతి శర్మ

29 మార్చి 2009 అభిప్రాయములు

by srikaaram in శ్రీ-ఫలములు

శ్లో: శ్రీరామచంద్ర: శ్రితపారిజాత:
     సమస్తకళ్యాణగుణాభిరామ:
     సీతాముఖాంభోరుహచంచరీక:
     నిరంతరం మంగళమాతనోతు

ఈ వారం గురు రాహువులు మకరంలోనూ, కుజుడు కుంభంలొనూ ,రవి బుధ శుక్రులు మీనంలోనూ, శని సింహంలోనూ, కేత్వు కర్కాటకంలోనూ, చంద్రుడు మేష, వృషభ, మిథున కర్కాటక రాశులలోనూ సంచరిస్తారు.

ప్రజలలో ద్వంద్వ వైఖరులు, వృత్తులలోనూ, ప్రవృత్తులలోనూ నిలకడ లేని పోకడలు, బంధువర్గంతో వైరాలు కనిపిస్తున్నాయి. మేధావీ వర్గానికి ఇది మంచి వారం. కొందరు పెద్దలు జైలు పాలు కాగలరు. విద్యార్థులు ధైర్యంగా ముందుకు సాగిపోవాలి.

మేష రాశి: ఆలోచనలు ఆవేశాన్ని పెంచుతాయి. నిజానిజాలకు దూరమవుతారు. తొందరపాటు తగదు. మానసిక శ్రమ నుంచి మార్పు తెచ్చుకుని మసలుకోవాలి. శ్రీసూక్తం చదవండి.వారాంతంలో ప్రయాణం ఉండవచ్చును.

వృషభ రాశి: అన్ని విషయాలలో మంచి వారం. డబ్బు సకాలంలో చేతికి అందుతుంది. మిత్రులలో కావలసిన వారెవరు అనేది ఒక సారి ఆలోచించాలి. ఈ వారం హోటల్ లో తినటం మంచిది కాదు. విష్ణు సహస్రనామం చదవండి.

మిథున రాశి: ఆదాయం వ్యయం సమంగా ఉంటాయి.పదోన్నతి కలదు. రాజకీయాలలో ఉన్న వారికి మంచి వారం. కొందరు వ్యక్తులు కలసి రావచ్చు. జీవిత భాగస్వామి ఆరోగ్యం జాగ్రత్తగా చూసుకోవాలి. లలితా సహస్రనామం పారాయణ చేయండి.

కర్కాటక రాశి: సత్కర్మల ఆచరణ వలన మంచి ఫలితాలు పొందుతారు. కల్పనా శక్తి, ఉపాసన ద్వారా కార్యాలను నెరవేర్చుకుంటారు. దైవ చింతన పెరుగుతుంది. సంఘానికి దూరంగా వెళ్లాలనుకుంటారు. కుటుంబ సభ్యులను విస్మరించకండి. మంచి సంగీతం వినండి.

సింహ రాశి: మంచి రోజులు ముందున్నాయి. ఈ వారం గడవనిచ్చి నిర్ణయాలు తీసుకోండి. స్త్రీలు ఆరోగ్యం కాపాడుకోవాలి. బంధువుల కలయిక ఉండవ్చ్చును. చిన్న చిన్న పనులకు సమయం ఎక్కువ కేటాయించి పెద్దవాటి పైన శ్రధ్ధ చూపరు. ఆదిత్య హృదయం చదవండి.

కన్య రాశి: గతంలో చేసిన మంచి పనులకు మంచి ఫలితాలు పొందగలరు. సంఘంలో గౌరవం పెరుగుతుంది. కొత్త పనులు చేతికి అందుతాయి కానీ ఓపిక, తీరిక లేవనిపిస్తాయి. సంకల్పం ఉంటే అవే దొరుకుతాయి. ముందుకు వెళ్లండి. కులదైవానికి సంబంధించిన ఉపాసన చేపట్టండి.

తుల రాశి: వారం మధ్యలో మంచి జరుగుతుంది. స్త్రీల పట్ల జాగ్రత్తగా వ్యవహరించండి. పై అధికారి మారనున్నాడు. ఇంటిలో మరమ్మత్తులు చేపడతారు. ప్రయాణాలలో జాగ్రత్త వహించాలి. ఆధ్యాత్మిక పరమైన విషయాలలో ఆసక్తి కలుగుతుంది. దుర్గా సప్తశ్లోకీ చదవండి.

వృశ్చిక రాశి:వివాహ ప్రయత్నాలు లాభిస్తాయి. వివాహ సంబంధాలు దగ్గరగా ఉన్న మిత్రవర్గంలోనే ఉన్నాయని తెలుసుకుంటారు.ఉబ్బసం ఉన్న వారు జాగ్రత్త వహించాలి. వారాంతంలో మంచి ఆదాయం కనిపిస్తున్నది. శివునికి అభిషేకం చేయించండి

ధను రాశి:సంతానం అభివృధ్ధిలోకి వస్తుంది. ఆలోచనలు కలసి వస్తాయి. రాజకీయాలలో ఉన్న వారు ఆలోచించి అడుగు ముందుకు వేయాలి. స్వంత మనుషులలో విభేదాలు ఉన్నాయి. వారాంతంలో కొద్దిగా శ్రమ ఉన్నది. హనుమాన్ చాలీసా చదవండి.

మకర రాశి: మొక్కులు తీర్చుకోవాలనిపిస్తుంది. కానీ ఆలోచిస్తూ ఉంటారు. దైవం విషయంలో శుభస్య శీఘ్రం అనుకోండి. అదే జరిగిపోతుంది. ఆరోగ్యం మెరుగవుతుంది.

పాత కలహాలు తొలగిపోతాయి. విద్యార్థులకు అదృష్టం బాగుంటుంది. సుబ్రహ్మణ్య కవచం చదువుకోండి.

 కుంభ రాశి: స్త్రీలకు మంచి లాభాలున్నాయి. విదేశాల నుంచి మంచి సమాచారం అందుతుంది. ఇంటిలోని సోదరుల గురించి మంచి వార్తలు వింటారు. ఈ గురువారం ఏ పని ప్రారంభించినా బాగుంటుంది. శ్రీసూక్తం చదవండి.

మీన రాశి: ఈ వారం మీ వ్యక్తిత్వం, మీ స్వాతంత్ర్యం, సృజనాత్మకత వెలుగులోకి వస్తాయి. కార్యాలయంలో మీరు ఇచ్చిన జాబితాకు పై స్థాయిలో చక్కని స్పందన లభిస్తుంది. మీరు ముందుకు రావటం లేదు కానీ మీలో చాలా దాగి ఉంది. అది ఆగిపోకుండా శ్రమించండి. కళ్ల విషయంలో జాగ్రత్త వహించండి. మహాసౌరం వినండి.

ఈ వారం మంచి మాట:

శ్లో: న హీదృశం సంవననం త్రిషు లోకేషు విద్యతే
దయా మైత్రీచ భూతేషు దానం చ మధురాచ వాక్
(మహాభారతం-ఆదిపర్వం)
అన్ని ప్రాణుల పట్ల దయ, మైత్రి, దానం, అందరి పట్ల మధురమైన మాటను ఉపయోగించుట – ముల్లోకాలలో వీటికి సమానమైన వశీకరణ లేదు!

ఓం శాంతి: శాంతి: శాంతి:

~~~***~~~

ఫొటో క్విజ్ 59-వేదాంతం శ్రీపతి శర్మ

29 మార్చి 2009 వ్యాఖ్యానించండి

by srikaaram in శ్రీ-సరదాలు!

ఈ గాయకుని గుర్తు పట్టారా?

Identify this singer

ఫొటో క్విజ్ 59-సమాధానం

29 మార్చి 2009 వ్యాఖ్యానించండి

by srikaaram in శ్రీ-సరదాలు!

కోటిపల్లి రైల్వే స్టేషన్ లోని రైల్ బస్ ఇది

This is the Rail bus at the Kotipalli Railway station